Süleyman Rüstəm. Arazım

Bax, Arazım, bu vəhşətə, bu dəhşətə şahid ol
Azadlığa şəhidlərin üzərindən gedir yol.
Biz iki qan qardaşının arasından axırsan,
Uzun illər bir sağalmaz yarasından axırsan.

Hey axırsan, bizim ulu babaların yaşından,
Tarix bilir nə tufanlar gəlib, keçib başından.
Sənsən mənim qana dönmüş ürəyimin aynası,
Deyirəm ki, külə dönsün bu köləlik dünyası

Al qoynuna dostlarını, ey bağrı qan Arazım,
Mənim qanlı göz yaşımdan yaranmısan, Arazım!
Od salmaqçın o taydakı cəlladların canına
Sinən üstdən yol ver, keçim qardaşımın yanına!